संघटनेबद्दल थोडक्यात

मी मराठी एकीकरण समितीच्या कामाला सन २०१५ ला सुरुवात झाली. त्या गोष्टीला दोन वर्षे झाली. २०१६ पर्यंत संघटना मराठी एकीकरण समिती या नावाने कार्यरत होती. पण काही तांत्रिक कारणामुळे नावाच्या अगोदर मी शब्द लावून संघटना मी मराठी एकीकरण समिती म्हणून काम करु लागली. या दरम्यान मुंबई विद्यापीठातील मराठी पत्रकारिता वर्गांच्या स्थलांतरा विरोधात संबंधितांची भेट घेऊन विरोध केला, दहिसरला जैनांकडून झालेल्या मराठी कुटुंबाला धक्काबुक्की विरोधात कुटुंबाची भेट घेतली, रिक्शा चालकांना मराठी येणे आवश्यक या दिवाकर रावतेंच्या निर्णयाचे भेटून अभिनंदन केले, सन २०१५ मध्ये छटपूजे विरोधात जुहू चौपाटी गाठली, मकर संक्रांती निमित्त दादर स्थानक व शिवाजी पार्कला तिळगुळ वाटप केले, दादर येथे माघी गणेशोत्सव साजरा केला. २०१६ मध्ये भायखळा येथील गुढीपाडवा शोभायात्रेत सहभागी, बोरीवली येथे शिवजयंती साजरी केली, दिवाळीला शहापूर येथील आदिवासी पाड्यांवर घराघरात व गोरेगाव मुंबई येथील रस्त्यावरील शाळेतील गरीब मुलांना फराळ व वह्यां पेनांच्या वाटपाचा उपक्रम राबविला, २०१७ मध्ये गुढीपाडवा सण, चिंचपोकळी येथे मिठाईचे वाटप केले. त्याबरोबर गुलाबाच्या फुलासह मराठी भाषेतूनच संवाद करा सांगणारे पत्रकही वाटले. मी मराठी एकीकरण समिती मराठी भाषा व मराठी संस्कृती जतन व संवर्धन करण्याचे काम करणार आहे. यासाठी मराठी माणसाचा लढा उभारीत आहोत.